EL BAÚL
Edición electrónica
jueves, 15 de mayo de 2008
ACTUACIÓN DE XENTIQUINA



Como toos sabéis, la selmana del 5 al 9 de mayu, cellebróse en toa Asturies la Selmana de les Lletres Asturianes. Con esti motivu, na fastera oeste de Xixón fácense tolos años unes Xornaes de la llingua. Esti añu yeren yá les XIII Xornaes. Participen tolos colexos de la zona nes diverses actividaes que se programen pa los diferentes cursos de tola primaria.
Los escolinos y escolines de terceru fuimos al Atenéu de La Calzada el xueves pasáu, 8 de mayu, a ver al grupu Xentiquina. ¡Cómo mos prestó! ¡Pasámoslo perbién!
Xentiquina ye un grupu de neños y neñes de primaria, de distintos cursos y que canten n’asturianu. Lleven venti años faciéndolo, como nos esplicó’l so mentor y direutor Nacho Fonseca, que tamién ye l’autor de toles lletres y músiques de les canciones. Vienen del colexu de Lieres (Sieru) y la mayoría son de terceru y cuartu. Nacho Fonseca ye’l so mayestru de música y d’asturianu. Yera pergraciosu contándonos les hestories de les canciones. Tamién mos presentó a los integrantes del grupu. Toos cantaben y baillaben perbién, pero fixámonos que lo de baillar facíalo una ñeña especialmente bien. Llámase Rocío.
Cantáronmos unos 16 cancios: Na granxa de Nel, Yera la princesa d’un país, La canción del pirata, Bambi, Marchóme la gata, Cayóme un diente, Hestoria d’un reló… Foi de principiu a fin mui divertíu porque, como casi toos sabíamos les canciones, cantamos con ellos, dimos palmes, etc. Pero la “bomba” foi’l Bocadillu Rock . Con esta canción zarraron l’actuación y fartucámonos de cantar con ellos y baillar. ¡Foi l’acabóse!
Prestónos munchísimu. Tanto, que al tornar pal colexu andando, díbemos cantando les canciones al altu la lleva.
¡Yá tenemos ganes de volver a velos otra vuelta!
Escrito por C. P. El Lloréu