EL BAÚL
Edición electrónica
jueves, 28 de febrero de 2008
Alcuentru con Esther Fonseca


Güei pela mañana escolinos y escolines de Llingua Asturiana de Cuartu, Quintu y Sestu cursu, tuvieron un alcuentru cola cantante asturiana Esther Fonseca.


Nesta actividá Esther fexo un repasu de la so carrera como cantante, cuntando a la reciella'l so entamu como miembru del Grupu Seliquín (anguaño Xentiquina) cuando tenía cinco años, con cancios bien conocíos por toos y toes. También cuntó la so evolución hasta l'actualidá, na que compaxina una rellumante carrera como solista y además ye la voz del grupu de folk Llangres, ensin dulda ún de los de más prestixu nel mundiu de la música celta.


Esther aprovechó pa cuntanos el llargu camín que supón sacar un discu, dende que se componen los cancios hasta que ta'l Cd rematáu, pasando poles milenta sesiones d'ensayos y grabación. La so charra cuntó cola audición de dalgún de los sos primeros cancios nel grupu Xentiquina, y canciones del so recién estrenáu discu "Viaxe", del que nos faló abondo, destacando un fechu que pa ella ye de lo más prestoso, y ye, que tolos temes que formen el discu, tán compuestos pol so pá, Nacho Fonseca, al que munchos conocemos pol so llabor en Xentiquina.


Tamién nos punxo una grabación d'un conciertu de la selmana pasada, pa que nos pudiéramos facer una idega de cómo suena en directu la so música con tol grupu de músicos que toquen con ella. Como nun podía ser d'otra manera regalónos un canciu "a capella", un canciu bien conocíu por toos nosotros: "Negra".


L'alcuentru finó cola firma d'exemplares del discu y una balagar d'autógrafos.

Dende equí queremos da-y a Esther les gracies por facenos esta fantástica visita y poner na nuesa conocencia tantes coses del mundiu la música que se ta faciendo agora mesmo n'Asturies y n'asturiano, y además por facelo de manera tan prestosa.


Si queréis conocer más coses de Esther Fonseca y escuchar dalgunos de los sos cancios, podéis facelo nel siguiente enlace, de xuru que vos va gustar:



Etiquetas:

Escrito por C. P. El Lloréu